पैशाच्या वादातून मुलीने केली आईची हत्या

 आई आणि मुलीमध्ये संपत्तीतील पैशाच्या देवाण-घेवाणीवरून वाद झाल्याने रागाच्या भरात मुलीने वृद्ध आईचे डोके दगडाच्या पाट्यावर आपटून तिला ठार केल्याची घटना घडली


आई आणि मुलीमध्ये संपत्तीतील पैशाच्या देवाण-घेवाणीवरून वाद झाल्याने रागाच्या भरात मुलीने वृद्ध आईचे डोके दगडाच्या पाट्यावर आपटून तिला ठार केल्याची घटना घडली. मुलीने पोलिसांना गुन्ह्याची कबुली दिल्याने पोलिसांनी तिला अटक केली आहे. दरम्यान, शुक्रवारी आरोपीला न्यायालयात हजर केले असता दोन दिवसांची पोलिस कोठडी मिळाली आहे.

शहरातील जुन्या आरटीओ रोडवरील हनुमान मंदिराच्या पुढे असलेल्या स्वप्नशिल्प अपार्टमेंटच्या पहिल्या मजल्यावर ६० वर्षीय सरुबाई काशीनाथ कांडेलकर आणि त्यांची विधवा मुलगी कविता बावस्कर (वय ४०) या राहत होत्या. सरुबाई यांना तीन मुली आहे. दोन मुली बाहेरगावी राहतात. कविताचा मुलगा पुणे येथील एका इंजिनीअरींग कॉलेजमध्ये शिकत आहे. सरुबाई यांनी आपली संपत्ती तिन्ही मुलींच्या नावे करून दिली होती. दरम्यान, बुधवारी रात्रीच्या सुमारास स्वयंपाक खोलीत सरुबाई यांचा मृतदेह रक्ताच्या थारोळ्यात आढळून आल्याने परिसरात खळबळ उडाली. घटनेची माहिती मिळताच खदान पोलिस स्टेशनचे पोलिस निरीक्षक डी. सी. खंडेराव आणि गुन्हे शाखेचे शैलेश सपकाळ पथकासह घटनास्थळी पोहोचले. दरम्यान, पोलिसांनी हत्येचा संशय व्यक्त करीत मृत महिलेच्या मुलीस चौकशीसाठी ताब्यात घेतले. पोलिसांनी चौकशी केली असता कविताने आपल्या जबाबात गुन्ह्याची कबुली दिली. आई आणि मुलीमध्ये संपत्तीच्या पैशाच्या कारणावरून वाद झाल्याचे तपासात पुढे आले आहे. घटनेच्या दिवशी दुपारी एक लाख रुपयाच्या आर्थिक व्यवहारातून दोघी मायलेकीमध्ये वाद झाला. रागाच्या भरात कविताने वृद्ध आईचे डोके दगडी पाट्यावर आपटून तिला ठार केले. खदान पोलिस स्टेशनमध्ये गुरुवारी रात्री आरोपी मुलीविरोधात हत्येचा गुन्हा दाखल केला आहे. शुक्रवारी आरोपी कविताला जिल्हा न्यायालयात हजर केले असता प्रथम श्रेणी न्यायदंडाधिकारी नातू यांनी आरोपीला १४ मार्चपर्यंत दोन दिवसांची पोलिस कोठडी सुनावली आहे. या प्रकरणाचे तपास अधिकारी सहायक पोलिस निरीक्षक संजय गवई व सहायक सरकारी अभियोक्ता अतुल गवळी यांनी सरकार पक्षाच्या वतीने युक्तिवाद केला. आरोपीतर्फे अॅड. नरेंद्र बेलसरे व अॅड. श्रीकांत काळे यांनी काम पाहिले.

Post a Comment

0 Comments
* Please Don't Spam Here. All the Comments are Reviewed by Admin.

Ads Area