अल्पवयीन मुलीवर अत्याचार; आरोपीस सक्तमजुरी

 सौदी अरेबियाहून काही कामानिमित्त मुंबईत नातेवाईकाच्या घरी आलेल्या इसमाने त्या घरातील अल्पवयीन मुलीवर बलात्कार केल्याच्या प्रकरणात विशेष पोक्सो न्यायालयाने आरोपीला नुकतेच दोषी ठरवले.




मुंबई:

सौदी अरेबियाहून काही कामानिमित्त मुंबईत नातेवाईकाच्या घरी आलेल्या इसमाने त्या घरातील अल्पवयीन मुलीवर बलात्कार केल्याच्या प्रकरणात विशेष पोक्सो न्यायालयाने आरोपीला नुकतेच दोषी ठरवले. त्याला दहा वर्षे सक्तमजुरीची शिक्षा व २५ हजार रुपयांचा दंड ठोठावण्यात आला. दंडाची रक्कम न भरल्यास अतिरिक्त तीन महिन्यांची शिक्षा सुनावतानाच पीडित मुलीला भरपाई म्हणून २० हजार रुपये देण्याचा आदेशही न्या. भारती काळे यांनी दिला.

मोहम्मद तोफिक मोहम्मद रफिक शेख असे दोषी इसमाचे नाव आहे. मूळचा उत्तर प्रदेशातील असलेला रफिक हा अनेक वर्षांपासून कामानिमित्त सौदी अरेबियामध्ये होता. जून-२०१८मध्ये तो वैद्यकीय उपचार, चाचण्या आणि पासपोर्टच्या कामासाठी मुंबईत आला होता. त्यावेळी तो आपल्या एका नातेवाईकाच्या घरी थांबला होता. ११ जून २०१८च्या रात्री घरात सर्व जण झोपले असताना पहाटे २.४५च्या सुमारास रफिकने १४ वर्षीय मुलीला झोपेतून जागे केले. तिचा हात पकडून तिला पोटमाळ्यावर नेले. तिथे त्याने तिच्यावर जबरदस्तीने बलात्कार केला, असा आरोप होता. मुलीच्या गुप्तांगातून रक्त येत असल्याचे पाहून मुलीच्या आईने पतीला त्याविषयीची माहिती दिल्यानंतर मुलीकडे चौकशी करण्यात आली. त्यानंतर भेदरलेल्या मुलीने सर्व हकिगत सांगितली. कुटुंबीयांनी तक्रार दाखल करताच मलबार हिल पोलिसांनी पोक्सो कायदा तसेच भारतीय दंड संहितेच्या विविध कलमांखाली एफआयआर नोंदवून रफिकला अटक केली. तेव्हापासून रफिक तुरुंगातच आहे.

'फिर्यादी कुटुंबीयांची इच्छा होती की मी त्यांच्या या मुलीशी निकाह करावा. कारण मी सौदी अरेबियामध्ये राहतो आणि माझी आर्थिक स्थिती उत्तम आहे. म्हणून त्यांनी मला या खोट्या प्रकरणात गोवले', असा बचाव रफिकने करण्याचा प्रयत्न केला. मात्र, पीडित मुलीच्या वैद्यकीय तपासणीअंती तिच्यावर बलात्कार झाल्याचे स्पष्ट झाले. पीडित मुलीच्या कपड्यांवरील रक्ताचे डाग व अन्य पुरावे, न्यायसहायक प्रयोगशाळेचा अहवाल तसेच पीडित मुलगी व तिच्या कुटुंबीयांच्या साक्षी आणि परिस्थितीजन्य पुरावे लक्षात घेऊन न्यायालयाने रफिकला दोषी ठरवले.

Post a Comment

0 Comments
* Please Don't Spam Here. All the Comments are Reviewed by Admin.

Ads Area