सचिन वाझेंच्या वसुलीचे रेटकार्ड लिहिलेली डायरी सीबीआयच्या ताब्यात

 अनिल देशमुख यांच्यावर 100 कोटींची वसूली करण्याचे आदेश दिल्याच्या आरोपांचा सीबीआय प्राथमिक तपास करत आहे. (CBI Sachin Vaze Diary )




मुंबई : निलंबित पोलीस अधिकारी सचिन वाझे यांच्या केबिनमधून सापडलेली डायरी सीबीआयने ताब्यात घेतली आहे. या डायरीमध्ये त्यांच्या सर्व वसुलीचे रेटकार्ड सापडले आहेत. किती जणांकडून किती देणीघेणी बाकी आहेत, याची नोंद डायरीत असल्याची माहिती आहे. डायरीतून अनेक आर्थिक व्यवहार उघडकीस येण्याची शक्यता आहे. (CBI to probe Sachin Vaze Diary in 100 crore allegations on Anil Deshmukh)



एनआयएला सचिन वझे यांच्या निकटवर्तीय मीना जॉर्ज यांच्या घरातूनही डायरी सापडली होती. सीबीआयने ती डायरीही ताब्यात घेतली आहे. माजी गृहमंत्री अनिल देशमुख यांच्यावर 100 कोटींची वसूली करण्याचे आदेश दिल्याच्या आरोपांचा सीबीआय प्राथमिक तपास करत आहे.



अनिल देशमुखांचीही चौकशी याच आठवड्यात

सीबीआयच्या सूत्रांच्या माहितीप्रमाणे या आठवड्यातच अनिल देशमुख यांना सीबीआय चौकशीसाठी बोलवण्याची शक्यता आहे. सीबीआयला प्राथमिक तपासणीसाठी दोन आठवड्यांचा कालावधी देण्यात आला होता. काल सीबीआय अधिकारी सचिन वाझेंच्या दोन वाहन चालकांना डीआरडीओमध्ये स्वतः घेऊन आले होते. तर पीए कुंदन आणि पलांडे यांना समन्स पाठवून बोलावले गेले होते. या सर्वांची 8 ते 10 तास चौकशी केली गेली. यापूर्वी सचिन वाझे, बार मालक महेश शेट्टी, मुंबईचे माजी पोलीस आयुक्त परमबीर सिंह, फिर्यादी जयश्री पाटील यांचे जबाब आधीच नोंदवले गेले आहेत.


एनआयएकडून सीबीआयची मागणी मान्य

मुंबईचे माजी पोलीस आयुक्त परमबीर सिंह यांनी अनिल देशमुख यांच्यावर केलेल्या भ्रष्टाचाराच्या आरोपांची चौकशी करणाऱ्या केंद्रीय अन्वेषण विभागाने (CBI) सचिन वाझे आणि विनायक शिंदे यांची डायरी उपलब्ध करुन देण्याची मागणी केली होती. यामध्ये सचिन वाझे खंडणी गोळा करत असलेल्या मुंबईतील बार आणि रेस्टॉरंटसचा तपशील आहे. ही डायरी तपासासाठी आपल्याला मिळावी, अशी मागणी सीबीआयने NIA कोर्टात केली होती.


काय आहे डायरीत

सचिन वाझेंच्या ऑफिसची झाडाझडती घेताना एनआयएच्या हाती सचिन वाझेंची डायरी लागली होती. कोणत्या दिवशी कोणाला भेटायचंय, याचीही तारीख डायरीत नमूद करण्यात आली आहे. पब्ज, बार, बुकी आणि इतर महत्त्वाच्या कारवायांचा उल्लेख आहे.

Tags

Post a Comment

0 Comments
* Please Don't Spam Here. All the Comments are Reviewed by Admin.

Ads Area