वादग्रस्त ट्वीटप्रकरण : राणा अयुब यांना अटकेपासून संरक्षण

 

उत्तर प्रदेश पोलिसांनी एफआयआर नोंदवल्याने अटकेची टांगती तलवार असलेल्या पत्रकार राणा अयुब यांना मुंबई उच्च न्यायालयाने सोमवारी तात्पुरता दिलासा दिला. गाझियाबाद येथे एका मुस्लिम वृद्धाला काहींनी मारहाण करून 'जय श्रीराम' म्हणण्यास भाग पाडले, अशा आशयाचा व्हिडीओ ट्विटरवर पोस्ट करून अयुब यांनी दोन धर्मांत तेढ निर्माण करण्याचा प्रयत्न केला असा एफआयआर त्यांच्यावर दाखल करण्यात आला आहे. या प्रकरणी उत्तर प्रदेशातील न्यायालयात अटकपूर्व जामीन अर्ज करता यावा यासाठी उच्च न्यायालयाने त्यांना चार आठवड्यांपुरते अटकेपासून संरक्षण दिले.

उत्तर प्रदेशच्या गाझियाबादमधील लोणी बॉर्डर पोलिस ठाण्यात १५ जून रोजी भारतीय दंड संहितेच्या कलम १५३ (दंगल होण्यासाठी चिथावणे), १५३-अ (धर्माच्या नावाखाली दोन समाजांत तेढ निर्माण करणे), २९५-अ (हेतूपूर्वक धार्मिक भावनेला ठेच पोचवणे) व १२०-ब (गुन्हेगारी कट) या आरोपांखाली अयुब यांच्यासह अन्य काहींवर एफआयआर नोंदवण्यात आला. त्यात पोलिसांनी अयुब यांच्याबरोबरच ट्विटर आयएनसी, ट्विटर कम्युनिकेशन्स इंडिया, 'दी वायर' वेबसाईट, पत्रकार मोहम्मद झुबेर, काँग्रेस नेते शमा मोहम्मद, सलमान निझामी, मस्कूर उस्मानी व लेखिका सबा नक्वी यांना आरोपी केले आहे. आरोपींनी व्हिडओची विश्वासार्हता न तपासताच तो सोशल मीडियावर प्रसारित करून धार्मिक तेढ वाढवण्याचा प्रयत्न केला, असा एफआयआरमध्ये आरोप आहे. अयुब यांनी याविषयी उत्तर प्रदेशातील संबंधित न्यायालयात दाद मागण्यासाठी मुदत मिळावी याकरिता ट्रान्झिट अटकपूर्व जामिनासाठी अर्ज केला होता.

'अर्जदार या पत्रकार असून त्यांनी केवळ एक व्हिडीओ आपल्या ट्विटर हँडलवर फॉरवर्ड केला. तो व्हिडीओ उचित नसल्याचे लक्षात येताच १६ जून रोजी त्यांनी तो हटवला. ज्या कलमांखाली अयुब यांच्याविरोधात गुन्हा नोंदवण्यात आला आहे त्यानुसार कमाल शिक्षा ही ३ वर्षांची आहे. त्यामुळे त्यांना उत्तर प्रदेशातील संबंधित न्यायालयात दाद मागण्याची संधी मिळायला हवी', असे म्हणणे अयुब यांच्यातर्फे ज्येष्ठ वकील अॅड. मिहिर देसाई यांनी न्या. प्रकाश नाईक यांच्यासमोर मांडले. त्यानंतर या प्रकरणाची वस्तुस्थिती लक्षात घेऊन न्या. नाईक यांनी अयुब यांना ४ आठवड्यांपुरते अटकेपासून संरक्षण दिले. अटक केल्यास उत्तर प्रदेशातील पोलिसांनी अर्जदाराला २५ हजार रुपयांच्या वैयक्तिक हमीवर सोडावे. अर्जदाराला मुदतवाढ मिळणार नाही', असे न्यायाधीशांनी आदेशात स्पष्ट केले.

धार्मिक रंग देणे चुकीचे

वयोवृद्ध अब्दुल समद सैफी यांना झालेल्या मारहाण प्रकरणाचा व्हिडीओ १४ जून रोजी सोशल मीडियावर व्हायरल झाला होता. त्यात काहींनी 'जय श्रीराम' व 'वंदे मातरम‌‌' बोलण्यास भाग पाडून मारहाण केल्याचे त्यांनी म्हटले होते. मात्र, मारहाण धार्मिक कारणावरून झालेली नसून सैफी यांनी विकलेल्या तावीजबाबत नाखूश असलेल्यांनी त्यांना मारहाण केली, असे गाझियाबाद पोलिसांनी म्हटले आहे.

Post a Comment

0 Comments
* Please Don't Spam Here. All the Comments are Reviewed by Admin.

Ads Area