Gujarat: कर्ज फेडण्यात अपयश... व्यापाऱ्याला अर्धनग्न करून रस्त्यावर धिंड

 

सूरत : करोना काळात कर्ज फेडण्यात अपयश आल्यानं सूरतमध्ये एका व्यापाऱ्याला अर्धनग्न करून त्याची धिंड काढण्यात आल्याची धक्कादायक घटना समोर येतेय. पीडित व्यापाऱ्याचे कपडे उतरवून, कंबरेवर साडी बांधून आणि हातात 'चोर' असल्याचं लिहिलेली पाटी घेऊन त्याची भररस्त्यात धिंड काढली गेली. पोलिसांनी हे कृत्य करणाऱ्या आरोपी व्यापाऱ्याला अटक केलीय.



सूरतच्या रिंग रोडवर न्यू टी टी मार्केटमध्ये ही घटना घडलीय. पीडित व्यापारी मूळचा तामिळनाडूचा रहिवासी आहे. सूरतमध्ये येऊन तो टेक्सटाईल्स मार्केटमध्ये काम करत होता.

चंद्रकांत जैन नावाच्या एका व्यापाऱ्याकडून पीडित व्यक्तीनं कर्जानं काही पैसे घेतले होते. त्यातील चार लाख रुपयांची परतफेड अद्याप बाकी होती.चंद्रकांत जैन याला कर्जदार व्यापारी या भागात आल्याचं समजताच त्यानं व्यापाऱ्याला शोधून काढलं. आरोपी व्यापारी जैन आणि त्याच्या साथीदारांनी पीडित ५५ वर्षीय व्यापाऱ्याला पैशांसाठी भररस्त्यात गाठलं. त्याची अर्धनग्न धिंड काढत या घटनेचा व्हिडिओही बनवला. त्याला कपडे उतरवण्यास भाग पाडलं गेलं. त्याच्या कंबरेला साडी गुंडाळण्यात आली. चोर असल्याची पाटी त्याच्या हातात देण्यात आली... यावेळी मान खाली घालून कर्जदार व्यापाऱ्याला चालणं भाग पडलं.

आरोपींनी या संपूर्ण घटनेचे फोटो आणि व्हिडिओही काढले. धक्कादायक म्हणजे, दिवसाढवळ्या भररस्त्यात हा प्रकार सुरू असताना कुणीही पीडिताच्या मदतीसाठी पुढे आलं नाही.

व्हिडिओच्या माध्यमातून हे प्रकरण समोर आल्यानंतर पोलिसांनी या प्रकरणाचा तपास सुरू केला. पोलिसांनी पीडित व्यापाऱ्याला शोधून काढलं. मात्र, पोलिसांत तक्रार दाखल करण्यासाठी पीडित व्यापाऱ्यानं नकार दिला. त्यानंतर पोलिसांनी स्वत:हूनच या घटनेची नोंद घेत तक्रार दाखल केली. तसंच आरोपी जैन आणि त्याचे दोन साथीदार शिवा आणि सोहम यांच्याविरोधात खटला दाखल करण्यात आला.

Post a Comment

0 Comments
* Please Don't Spam Here. All the Comments are Reviewed by Admin.

Ads Area