नागपूर : दारू प्यायल्यानंतर उद्भवलेल्या वादातून गुन्हेगाराचा निर्घृण खून

 

नागपूर : दारू प्यायल्यानंतर उद्भवलेल्या वादातून दोघांनी टिकास व फावड्याने वार करीत गुन्हेगार गब्बर ऊर्फ सचिन इरपाते (वय ४०, रा. संजय गांधीनगर, हुडकेश्वर) याची निर्घृण हत्या केली. हत्येनंतर मारेकऱ्यांनी गब्बरचा मृतदेह धुवून तो खड्ड्यात फेकला. ही थरारक घटना शनिवारी दुपारी १ वाजताच्या सुमारास कोराडीतील चक्कीखापा येथे उघडकीस आली.




खून करून पुरावा नष्ट केल्याचा गुन्हा कोराडी पोलिसांनी दाखल केला. तसेच रवी नारायण पाराडे (वय ५२, रा. विष्णूमातानगर) व सुभाष सखाराम भाकरे (वय ५८, रा. महाकालीनगर) या दोन मारेकऱ्यांना अटक केली. सचिनविरुद्ध अजनी पोलिस स्टेशनमध्ये मारहाणीचे तर, रवी व सुभाषविरुद्ध खुनाचा गुन्हा दाखल आहे, अशी माहिती पोलिसांनी दिली. काही वर्षांपासून तिघेही गुन्हेगारी सोडून सामान्य जीवन जगायचे. चक्कीखापा परिसरात सोहेल राणा यांची शेती असून, तेथे रिसॉर्टचे बांधकाम सुरू आहे. तिघेही तेथे काम करतात व तिथेच एका खोलीत राहतात. शुक्रवारी रात्री १० वाजताच्या सुमारास तिघांनी दारू प्यायली. त्यानंतर दोघांचा गब्बरसोबत वाद झाला. गब्बरने दोघांना शिवीगाळ करून ठार मारण्याची धमकी दिली. तो मद्यधुंद अवस्थेत खुर्चीवर बसला होता. गब्बर ठार मारेल, या भीतीने दोघांनी त्याचा खून केला. नंतर त्याचा मृतदेह धुतला व परिसरातील एका खड्ड्यात फेकला. खोलीतील रक्त पुसून पुरावा नष्ट केला. शनिवारी दुपारी येथेच काम करणारा युवक आला. त्याला गब्बर खड्ड्यात पडलेला दिसला. त्याने दोघांकडे विचारणा केली. 'गब्बर झोपला आहे', असे त्यांनी युवकाला सांगितले. युवकाला संशय आला. त्याने राणा यांना माहिती दिली. राणा यांनी कोराडी पोलिसांना कळविले. पोलिस उपायुक्त सारंग आव्हाड, साहाय्यक पोलिस आयुक्त रोशन पंडित, कोराडी पोलिस स्टेशनचे वरिष्ठ पोलिस निरीक्षक कृष्णा शिंदे यांच्यासह पोलिसांचा ताफा तेथे पोहोचला. पंचनामा करून पोलिसांनी गब्बरचा मृतदेह मेयोकडे रवाना केला. पोलिसांनी खुनासह विविध कलमान्वये गुन्हा दाखल करून रवी आणि सुभाषला अटक केली.




Post a Comment

0 Comments
* Please Don't Spam Here. All the Comments are Reviewed by Admin.

Ads Area