पाठलाग, डोळा मारल्याप्रकरणी चार वर्षांची शिक्षा

 

मुंबई : अल्पवयीन मुलीचा पाठलाग करणे, तिला डोळा मारणे आणि तिला शंभर रुपयांचे आमिष दाखवून जवळ बोलावणे २८ वर्षीय तरुणाला महागात पडले असून विशेष पोक्सो न्यायालयाने त्याला नुकतीच चार वर्षांची शिक्षा ठोठावली आहे.

याप्रकरणी १२ वर्षीय मुलीच्या आईने ६ मार्च २०१७ रोजी देवनार पोलिस ठाण्यात एफआयआर नोंदवला होता. 'मुलगी दूध आणण्यासाठी घराबाहेर गेली असताना, आरोपी तरुणाने तिला डोळा मारला आणि तिचा पाठलाग केला. तसेच तिला शंभर रुपयांची नोट दाखवत सोबत येण्यास सांगितले. तेव्हा मुलगी घाबरून घरी पळून आली आणि तिने मला घडलेली हकिगत सांगितली. त्यानंतर मी घडलेला प्रकार माझ्या पतींना सांगितला. या तरुणाने पूर्वीही मुलीचा पाठलाग केल्याचे प्रकार घडले होते', असे मुलीच्या आईने तक्रारीत म्हटले होते. पोलिसांनी याप्रकरणी गुन्हा नोंदवल्यानंतर मजूर म्हणून काम करणाऱ्या तरुणाला अटक केली. तसेच तपासाअंती त्याच्याविरुद्ध आरोपपत्र दाखल केले.

'पीडित मुलगी किंवा मुलीचे कुटुंब आणि आरोपी यांच्यात पूर्ववैमनस्य होते आणि त्यातून आरोपीला खोट्या प्रकरणात गोवण्यात आले असल्याचे दाखवणारे कोणतेही पुरावे बचाव पक्षाकडून मांडण्यात आलेले नाहीत. मुलीला खोटी साक्ष देण्यासाठी पढवण्यात आल्याचेही दाखवण्यात आलेले नाही. त्यामुळे पीडित मुलीचा जबाब व तिच्या साक्षीवर अविश्वास दाखवण्याचे कोणतेही कारण दिसत नाही. आरोपीने पूर्वीही दोन-तीन वेळा पीडितेचा पाठलाग केल्याचे पुराव्यांतून स्पष्ट होत आहे. गुन्हा घडल्याच्या दिवशी त्याने तिला डोळा मारला आणि शंभर रुपये देऊ करून सोबत चलण्यास सांगितले. या कृतीतून त्याने पीडितेचा विनयभंग केल्याचे सिद्ध होते. त्यामुळे भारतीय दंड संहितेच्या कलम ३५४-ड व कलम ५०९ अंतर्गत तो दोषी ठरतो', असे न्या. सीमा जाधव यांनी आपल्या निर्णयात स्पष्ट केले. तसेच याप्रकरणी त्याने आतापर्यंत भोगलेल्या (चार वर्षे) तुरुंगवासापर्यंतची शिक्षा आणि आणखी तीन दिवसांच्या साध्या कारावासाची शिक्षा न्यायालयाने ठोठावली.

Post a Comment

0 Comments
* Please Don't Spam Here. All the Comments are Reviewed by Admin.

Ads Area