पाऊस बरसला, टँकर परतले!


नाशिक: जिल्ह्यात दुष्काळी तालुक्यातील काही मंडळांत दमदार पावसाने हजेरी लावल्याने स्थानिक पातळीवरच पाण्याची उपलब्धता झाली आहे. त्यामुळे १७ गावे आणि ३५ वाड्या अशा ३५ ठिकाणी पाणीपुरवठा करणारे टँकर बंद करण्यात आले आहेत. त्यामुळे पाणी पुरवठा करणाऱ्या टँकर्सची संख्या १५ दिवसांत २६ वरून ११ वर आली आहे.

जिल्ह्यात दुष्काळी तालुक्यांत पावसाने दमदार हजेरी लावली आहे. त्यामुळे स्थानिक पातळीवरच पाण्याची उपलब्धता होऊ लागली आहे. परिणामी टँकरच्या पाण्यावर अवलंबून असलेल्या गावांनाही मोठा दिलासा मिळाला आहे. १५ जुलैला जिल्ह्यात ३५ गावे आणि १९ वाड्या अशा ५४ ठिकाणी २६ टँकर्सद्वारे पाणीपुरवठा करण्यात सुरू होता. तब्बल ५५ हजार लोक या टँकरच्या पाण्यावर अवलंबून होते. परंतु अनेक तालुक्यांत पावसाने जोरदार हजेरी लावल्याने स्थानिक पातळीवरच पाण्याचे स्रोत निर्माण झाले आहेत. त्यामुळे टँकरद्वारे पाणीपुरवठा करण्याची आवश्यकतादेखील उरलेली नाही. १७ गावे आणि १८ वाड्यांना टँकरद्वारे होणारा पाण्याचा पुरवठा बंद करण्यात आला आहे. त्यामुळे बागलाण, चांदवड, देवळा, मालेगाव, नांदगाव आणि येवला या तालुक्यांतील १८ गावे आणि एका वाडीला टँकरद्वारे पाणी पुरविण्यात येत आहे. या ठिकाणचे २६ हजार १०२ नागरिक अजूनही टँकरच्या पाण्यावर अवलंबून आहेत. येवला आणि बागलाण तालुक्यात सर्वाधिक प्रत्येकी तीन टँकर पाणीपुरवठा करीत आहेत.


२६ विहिरी अजूनही अधिग्रहित

भरपूर पाणी असलेल्या त्या त्या भागातील विहिरींचे देखील गावकऱ्यांच्या सोयीसाठी अधिग्रहण केले जात असते. त्यानुसार १५ दिवसांपूर्वी अशा गावांसाठी ४६ आणि टँकरसाठी दहा अशा एकूण ५६ विहिरींचे अधिग्रहण करण्यात आले होते. परंतु सद्यस्थितीत गावांसाठी २२ आणि टँकरसाठी चार अशा २६ विहिरीच अधिग्रहित असल्याची माहिती जिल्हा प्रशासनाने दिली आहे.

तालुकानिहाय दुष्काळी गावे आणि टँकर सुविधा

तालुका गावे टँकर

बागलाण ०५ ०३

चांदवड ०१ ०१

देवळा ०३ ०२

मालेगाव ०१ ०१

नांदगाव ०१ ०१

येवला ०८ ०३

एकूण १९ ११

    Post a Comment

    0 Comments
    * Please Don't Spam Here. All the Comments are Reviewed by Admin.

    Ads Area